المسرحي والكاتب محمد العامري العراقي

شهدنا في الفترة الاخيرة من الدوري العراقي منافسات قوية وشهدتها الساحة الرياضية العراقية ايضاً .. ووكلنا شاهدنا كيف يتوج الزوراء وكيف يتوج النادي الاسباني (برشلونه).. وكلنا تابعنا مباريات الدوري العراقي والبعض منا قد شاهد مباريات الدوري الاسباني او اي دوري آخر سواء كان عربي او اجنبي..

 طبعا نحن لا نقارن انفسنا بهم (لان احنه وين وهم وين) ولكن للفضول الذي بداخل دفعني الى عمل او الى جولة صغيره اتجولها داخل المقاهي وبين الازقة والشوارع وارى انعكاسات الدوري العراقي واخر تطوراته .. طبعا الجوله اكثر شئ في المقاهي .. بدء اولاً من احدى الازقه او الاركان في مدينة البصره (منطقة العشار) دخلت لتلك المقى وهيه مشبعه بدخان النارجيله ورائحتها التي اكاد اختنق منها ونحن في جو حار .. ولكن من الغريب اني ارى شيوخا ورجالا وشبابا جالسين ولايهمهم هذا الامر,،، دخلت للمقهى وانا متفائل ومتحير كيف اخلق موضوع للدردشه في المقهى يخص الدوري العراقي .. المهم جلست في خانه يكثر فيها رجال كبار السن..

+ السلام عليكم ...

- (الجميع) وعليكم لسلام ورحمة الله وبركاته.

+ ما زال التفكير في بالي لعمل حوار .

- (صيحات يمينا ويسار المقهى) ساكك الله بالخير .

+ الله بالخير (كررتها لاكثر من مره)

   استكانة الشاي وصلتني وسكرها الزياده والحو جعلني انطق وينمي عقلي بكلمات حلوه .. امامي شيخ وبجنب رجل كبي السن لم يكف عن (نبش) اسنانه بعود الشخاط .. وفي الجانب الاخر رجل ذو صفات مميزة (مبين من قاطه).. بدءت الحوار ..

+ عمي الحجي اشلونك ..

- هلا يبا حياك الله .. هلا بالشباب

+ حجينه يا شباب ظل شباب اشو شيبنه اكثر منكم..

- (يضحك) هههههههههههه ولعد شدكول علينه.

+ دخلت في صلب الموضوع ... اكول حجي ماكو تلفزيون ينقل كاس العالم ..

- ظل يباوع اليه كال وشنو تريد تسوي بكأس العالم ..

+ كلتله حجينه غير امتابعينه ونريد نستمتع بيه ..

- كالي انت متابع لو هجي بس تباوع

+لا حجينه متابع ..

- (سكوت)

+ خفت  سكوته وقلت انه لربما غلق الموضوع (صوت اتي من خلفي)

- اليوم منو يلعب ..

+ فرنسا والبرازيل .

- صوت رجل اخر :- اي خاطر نشوفها

  تشجعت بدخولي بموضوع والزبده كما نسميها ..

+حجينه انت تابع الدوري العراقي وخاصة هذا الموسم ..

- اي يبه انه وحد ما اتابعه ..

+ (فرحت) وشنو شفت بيه ..

- يبه شفت بيه الظيم والقهر ..

+عمي ليش ؟؟

- يبا اذا هو الملعب مخربط .. وثانيا امكانيات ما عدهم وثالثا الوضع بعد اكثر تخربط ..

+ على كيفك حجينه .. الدوري بيه منافسات قويه ولاعبين ممتازين ومدربين يمتلكون عقليه المدرب الصحيح.

- يبا انه ما كلتلك على هذنه ما بيه .. بس اريد اكولك انت اتابع دوري غير الدوري العراقي .. اجبته بنعم .. كالي وشفت اشلون انت ترتاح نفسياً لما تشوف الملعب وخضرته وتشوف الاهتمامات وتشوف التلفزيون يصور باحدث اجهزه وانقى صورة .. انه ما اعتب على قنتواتنه بس شنو الي بديها .. بس انه اعتب على المسؤولين اي ليش هاي الاموال تروح منا ومنا ذبها على ملعب هي صعبه لو سوونه ملعب بيه خير غير ملعب الشعب حتى لو على كد اللاعبين هم كافي..

+ حجينه بس هذي الامور ما تخلينه ما نشوف الدوري العراقي..

- يبه يا وليدي يا حباب .. لمن تريد تاكل اكله من تشوف الترتيبات وتشوف الترتيب بالوجبه انت من نفسيتك تشتهي تاكل لو مو جوعان صح لو مو صح ..

+ صح يبا

- فلذلك علينه احنه كمشاهدين ومتابعين وكجمهور لفريقنه التشجيع ..  ولكن يجب ان يكون وقبل كل شئ هنالك نكهة خاصة يقدمها ..

 1- النادي الذي نشجعه

 2- المسهلات التي يضعها الاتحاد او منظمي الدورة..

 فلو كان الفريق المشجع من قبل الجماهير يتميز بادائه ويرقص ويعزف احلى نغمات الكوورة داخل المستطيل الاخضر فهذا يزيد من تفاعل الجماهير المشجه..

 اما عن المنظمين او المسؤولين .. ايه والله اعتب عليهم .. لان تعرف هسه بالعراق احنه ما نكله المستطيل الاخضر انكله المستطيل الاصفر (ابتسامه من عندي) اي يبه نسميه الاصفر .. هو ليش قابل ماكو حشيشه .. يبا انه ازرعها لو ينطوني فد 10 او اكثر من ملعب لا والله وداعتك من يخلص الدوري على ما يجي دوري ثاني انه مسويه جنه .. لان هذا الشئ يعكس على نفسيت اللاعب .... وشنو ينقصنه احنه حتى ما نسوي ملعب .. والله وداعتك عمي لو من كل واحد طابوقه جان سوينه ملاعب وحدايق .. بس اخخخخخخخخخ.. هو وينه التعاون .. (اشو لفريق العراقي ولعباته من كوه) عدالك مسوين علينه فضل كاعد يسووله لعبه ويه سوريا والاردن مع احتراماتي الهم .. والله من انه شاب لحد الان اي غير .. شوفلك اي فريق ...  ترى الحيه تموت من راسه .. اذا ما تلعب ويه الفرق الكبيره وتكسر راسها ما تكوملك رايه يبا ..

+ الحقيقة انه وكفت اهنانه اهدي بالعم الحجي نعمه لانه صار عصبي .. على الاتحاد ومسؤولين الرياضه ..

  كذلك اراء المقهى اجمهم اعطوني ارائهم المشابه للعم الحجي نعمه .. هكذا هو حال المشجع .. لا يريد غير ان تتوفر له النكهة والجماليه التي تحيط بيه من اجل ان تكون له طاقه تشجعه على تشجيع ناديه سواء كان الفريق من الدرجة الاولى او الثانيه او حتى الفرق الشعبيه .. من كلام حجينه عرفت ان لاعبنه حتى يقدم مستوى افضل وذات طابع جمالي يجب ان تكتمل جمالية الاشياء التي تحيط به قبل كل شئ .. لذا هذه نسخه منه الى  مسؤولي الرياضه والاهتمام بالمشجع لانه هو امتداد للرياضه اجمعها وهي اهم شئ وقبل كل شئ ان نهتم بها من حيث توفير وسائل النقل لها يعني تخصيص فد سيارات اذا كانت هنالك لعبه في محافظة اخرى على الاقل في المباراة النهائية لان الجمهور هو احد من يصنع جو اللعبه .. كذلك يجب اعطاءه حقه واضافة النكهة لملاعبنا كما طالب بها عمي الحجي .. وهذا كله مصلحة للرياضه العراقية ..

 وفي الاخير سولف مع الحجي عن المنتدى وعن منظميه وعن اعضاءه الي يكتبون ويناقشون ويهتمون بكل صغيره وكبيره لها علاقة بالرياضه وايضا هي تبادلك الرأي وكثير من الاخوان يكتبون ولكن الى متى الكتابه ............ اجابني الحجي بعد خروج دخان نارجيلته من فمه ..

- عمي امانه بركبتك كللهم الحجي يكول :- سلملي عليهم اهوايه اهواي وكللهم مشكورين على الجهود المبذوله والي تفعلوه من خلال كتاباتكم مثل ما كلي ابو جاسم وليدي ليس بغريب عليكم انتم ما تفعلوه وهذا كله لصالح الكره العراقية .. وشكرا للمسؤولين ..

  حقيقة اعجبني كلام الحجي والناس الي يحيطون بيه والمقهى كلها .. وخرجت الى البيت وانا مغمور بساعده كبرى لان هنالك ما زال احد يريد الخير بالعراق وما زال يتكلم بدون اي خوف وبكل جرأة ..

 طبعا هذا وقد سمعت نفس الكلام في المقاهي الاخرى والشوارع والاصدقاء ,, فنتمنى ان يصبح لدينا ملاعب واهتمامات رياضيه اكثر فاكثر .. ون شاء الله نحن نتأمل خيرا وطموحنا كبير بان نصبح احد افضل الرياضيين في العالم من جوانب الكره اجمعها.